يېتىمنىڭ ھەققىنى يېيىش
قىز بولسۇن ئوغۇل بولسۇن ئاتىسى ۋاپات بولۇپ كەتكەن نارەسىدە بالىلار يېتىم دېيىلىدۇ. بۇنداق بالىلارنىڭ ئاتىسىدىن قالغان مىراس ھەققىنى بەرمەسلىك ياكى تۇلۇق بەرمەسلىك، ئۇلارغا ئائىت ياخشى نەرسىلەرنى ناچار نەرسىلەرگە ئالماشتۇرۋېلىش، ئۇلارنىڭ مېلىنى تىجارەتكە دەسمايە قىلىپ، پايدا ئايرىپ بەرمەسلىك ياكى ھەققىنى تۇلۇق بەرمەسلىك ۋەياكى زىيان تارتسا زىياننى ئۇلارغا ئىتتىرىپ قويۇش … قاتارلىقلار يېتىمنىڭ مېلىنى يەۋالغانلىق بولىدۇ. يېتىمنىڭ مېلىنى يېيىش ھارامدۇر. يېتىمنىڭ مېلىنى يېيىش ئىنساننى جەھەننەمگە سۆرەيدۇ.
ئاللاھ تائالا يېتىمنىڭ مېلىنى يەۋالغان كىشىلەرنى بىۋاستە جەھەننەمگە كىرىدىغانلىقىنى بىلدۈرۈپ مۇنداق دەيدۇ:
﴿إِنَّ الَّذِينَ يَأْكُلُونَ أَمْوَالَ الْيَتَامَى ظُلْمًا إِنَّمَا يَأْكُلُونَ فِي بُطُونِهِمْ نَارًا وَسَيَصْلَوْنَ سَعِيرًا١٠﴾
«يېتىملەرنىڭ ماللىرىنى ناھەق يەۋالىدىغانلار قورساقلىرىغا چوقۇم ئوت يەيدۇ ۋە يېقىندا دوزاخقا كىرىپ كۆيىدۇ» – (4 – سۈرە نىسا، 10 – ئايەت).
